नेपाली कांग्रेसका नेता तथा समाजवादी चिन्तक प्रदीप गिरीको निधन भएको छ। उनी ७५ वर्षका थिए ।
क्यान्सर र निमोनियाको जटिलताका कारण तीन सातादेखि ललितपुरको मेडिसिटी अस्पतालमा उपचार हुँदै आएको थियो। उनको शनिबार राति ९ बजेर ३० मिनेट जाँदा निधन भएको परिवार स्रोतले जनाएको छ ।
गत वर्ष घाँटीमा क्यान्सर देखिएपछि उनलाई उपचारका लागि मुम्बईस्थित हिन्दुजा अस्पताल लगिएको थियो। करिब एक वर्ष उपचारमा पनि सन्तोषजनक नतिजा नआएपछि उनी नेपाल फर्किएका थिए।
नेपाल आउनासाथ क्यान्सरकै कारण विभिन्न समस्यासँगै निमोनियासमेत देखिएपछि गत साउन १० गते उनलाई मेडिसिटीमा भर्ना गरिएको थियो।
गिरी कांग्रेसभित्रका बौद्धिक नेता र समाजवादी चिन्तकका रुपमा परिचित थिए। १९४७ नोभेम्बरमा जन्मेका गिरि २०१७ सालदेखि राजनीतिमा सक्रिय रहँदै आएका थिए।
नेता गिरीको शव अन्तिम श्रद्धाञ्जलीका लागि आइतबार बिहान ९ देखि ११ बजेसम्म मेडिसिटी अस्पताल र ११ः३० देखि दिउँसो २ बजेसम्म कांग्रेस केन्द्रीय कार्यालय सानेपामा राखिने नेपाली कांग्रेसले जनाएको छ।
