वर्षा र हिमपातबाट हुन सक्ने विपद्को तयारीमा सातै प्रदेशलाई चौबिसै घण्टा उपलब्ध हुने स्वास्थ्य सम्पर्क व्यक्ति तोक्न भनिएको छ। स्वास्थ्य आपतकालीन तथा विपद् व्यवस्थापन इकाइले प्रदेशका स्वास्थ्य आपतकालीन कार्यसञ्चालन केन्द्रहरूलाई यसबारे पत्र पठाएको अनलाइनखबरले जनाएको छ।
पत्रमा सम्पर्क व्यक्तिको विवरण इकाइमा पठाउन र सार्वजनिक गर्न भनिएको समाचारमा उल्लेख छ। हब तथा स्याटेलाइट अस्पतालसँग मिलेर आकस्मिक चिकित्सकीय टोली र अन्य स्वास्थ्य जनशक्ति तयार राख्न पनि आग्रह गरिएको छ।
औषधि, उपकरण र एम्बुलेन्स कति उपलब्ध छन् भन्ने विवरण अद्यावधिक गर्नुपर्नेछ। घाइते तथा प्रभावितलाई ढिलाइ नगरी उपचारमा पुर्याउन एम्बुलेन्स प्रेषण केन्द्रसँग समन्वय गर्न भनिएको छ।
इकाइले स्वास्थ्यसम्बन्धी घटनाको दैनिक विवरणसमेत मागेको छ। घटना नभएको अवस्थामा पनि सोही जानकारी पठाउने व्यवस्था पत्रमा उल्लेख रहेको समाचारले जनाएको छ।
सत्य, तथ्य र स्वतन्त्र सामूदायिक डिजिटल मिडिया
