डिनिप्रो, युक्रेन — डिनिप्रोको रेल स्टेसनस्थित प्लेटफर्ममा बिहीबार रुसी ड्रोन आक्रमण हुँदा १३ जनाको मृत्यु भएको युक्रेनी राष्ट्रपति भोलोदिमिर जेलेन्स्कीले बताएका छन्। उनका अनुसार थप १० जना घाइते भएका छन्।
आक्रमणका बेला प्लेटफर्ममा स्थानीय यात्रु बोक्ने एउटा रेल र नियमित यात्रुवाहक अर्को रेल रोकिएका थिए। जेलेन्स्कीले एक्समा लेख्दै आक्रमणलाई भयावह भनेका छन्।
उनले विवरण सार्वजनिक गर्दासम्म १३ जनाको मृत्यु भएको पुष्टि भएको बताएका हुन्। घटनास्थलमा आवश्यक सबै आपत्कालीन सेवा परिचालित रहेको जनाउँदै उनले मृतकका परिवार र आफन्तप्रति समवेदना व्यक्त गरेका छन्।
आक्रमणबारे उनको विवरण र हताहतीको सङ्ख्या स्वतन्त्र रूपमा पुष्टि हुन सकेको छैन।
जेलेन्स्कीले केही रुसी धनाढ्य र रुसको ऊर्जा क्षेत्रमाथिका प्रतिबन्ध हटाइएको विषयमा पनि प्रश्न उठाएका छन्। प्रतिबन्ध हटेपछि रुसले तनाव घटाउनुको साटो युक्रेनी नागरिकमाथि कति ‘आतङ्ककारी आक्रमण’ गरिसक्यो भन्दै उनले प्रश्न गरेका हुन्।
रुसले आक्रमण बढाउँदा अमेरिका र युरोपले त्यसको जवाफमा न्यायोचित र निर्णायक कदम चाल्नुपर्ने कुरा युक्रेनले सुरुदेखि नै उठाउँदै आएको उनले उल्लेख गरेका छन्। युद्ध जारी रहुन्जेल मस्को र उसको युद्ध सञ्चालनलाई सघाउने संयन्त्रमाथिका प्रतिबन्ध खुकुलो पार्न नहुने उनको भनाइ छ।
उनले युरोपेली सङ्घ, अमेरिका र सात प्रमुख औद्योगिक राष्ट्रको समूह जी–७ लाई नयाँ र अझ कडा प्रतिबन्ध लगाउन आग्रह गरेका छन्। त्यसका लागि सहयोग गर्न तयार सबैलाई उनले धन्यवाद दिएका छन्।
सत्य, तथ्य र स्वतन्त्र सामूदायिक डिजिटल मिडिया
