काठमाडौँ — नेपालको सार्वजनिक ऋण पहिलो पटक ३० खर्ब रुपैयाँ नाघेको छ । गोरखापत्रका अनुसार सार्वजनिक ऋण व्यवस्थापन कार्यालयको तथ्याङ्कमा चालु आर्थिक वर्षको पहिलो त्रैमासको अन्त्यमा सरकारको कुल ऋण दायित्व ३० खर्ब नौ अर्ब ११ करोड ६६ लाख रुपैयाँ पुगेको छ ।
कुल ऋणमध्ये बाह्य ऋण १५ खर्ब ९८ अर्ब ८० करोड रुपैयाँ (कुलको ५३.१३ प्रतिशत) र आन्तरिक ऋण १४ खर्ब १० अर्ब ३१ करोड रुपैयाँ रहेको तथ्याङ्क छ ।
पहिलो त्रैमासमा मात्र १ खर्ब २३ अर्ब ३२ करोड रुपैयाँ ऋण थपिएको छ, जसमा आन्तरिकतर्फ १ खर्ब र बाह्यतर्फ २३ अर्ब ३२ करोड रुपैयाँ परिचालन भएको छ । कुल ऋण कुल गार्हस्थ्य उत्पादनको ४५.५९ प्रतिशत पुगेको छ ।
पहिलो त्रैमासमा सरकारले ऋण सेवाबापत ९८ अर्ब ८७ करोड रुपैयाँ भुक्तानी गरेको छ । आन्तरिक ऋणतर्फ ८२ अर्ब ७४ करोड रुपैयाँ (साँवा ६५ अर्ब १० करोड, ब्याज १७ अर्ब ६३ करोड) र बाह्य ऋणतर्फ १६ अर्ब १३ करोड रुपैयाँ (साँवा १२ अर्ब ६४ करोड, ब्याज ३ अर्ब ४९ करोड) भुक्तानी भएको छ ।
सरकारले चालु आर्थिक वर्षमा ६ खर्ब ५८ अर्ब २८ करोड रुपैयाँ सार्वजनिक ऋण परिचालन गर्ने लक्ष्य राखेको छ ।
सत्य, तथ्य र स्वतन्त्र सामूदायिक डिजिटल मिडिया
