काठमाडौँ — नेपालको सार्वजनिक ऋण पहिलो पटक ३० खर्ब रुपैयाँ नाघेको छ । सार्वजनिक ऋण व्यवस्थापन कार्यालयका अनुसार चालु आर्थिक वर्षको पहिलो त्रैमासको अन्त्यमा सरकारको कुल ऋण ३० खर्ब ६ अर्ब ७० करोड रुपैयाँ पुगेको छ ।
कुल ऋणमध्ये बाह्य ऋण १६ खर्ब २९ अर्ब रुपैयाँ र आन्तरिक ऋण १३ खर्ब ७६ अर्ब रुपैयाँ रहेको कार्यालयले जनाएको छ ।
आर्थिक वर्षको सुरुमा २८ खर्ब ९६ अर्ब रुपैयाँ रहेको सार्वजनिक ऋण पहिलो त्रैमासमा १ खर्ब १० अर्ब ४० करोड रुपैयाँले बढेको हो । कुल ऋण कुल गार्हस्थ्य उत्पादनको ४८.२८ प्रतिशत पुगेको कार्यालयको तथ्याङ्क छ ।
पहिलो त्रैमासमा सरकारले ऋण सेवा बापत १ खर्ब ९३ करोड रुपैयाँ खर्च गरेको छ, जसमध्ये ६४ अर्ब २५ करोड रुपैयाँ साँवा र ३६ अर्ब ६८ करोड रुपैयाँ ब्याज भुक्तानीमा गएको छ ।
सरकारले चालु आर्थिक वर्षमा ५ खर्ब ९५ अर्ब रुपैयाँ सार्वजनिक ऋण परिचालन गर्ने लक्ष्य राखेकोमा पहिलो त्रैमासमा ९८ अर्ब ५५ करोड रुपैयाँ उठाएको कार्यालयले जनाएको छ ।
सत्य, तथ्य र स्वतन्त्र सामूदायिक डिजिटल मिडिया
