जनकपुरधाम — धनुषामा एक महिला माइतीघरमा मृत फेला परेकी छन् र उनका श्रीमान् नजिकै मृत फेला परेको प्रहरीले जनाएको छ। महिलाको हत्या भएको हुन सक्ने आशंका प्रहरीले गरेको राससले जनाएको छ।
मिथिला बिहारी नगरपालिका–३ मथिलेश्वरस्थित माइतीघरमा ३० वर्षीया रीना देवी यादव धारिलो हतियारले लागेको जस्तो देखिने घाँटीको चोटसहित फेला परेकी हुन्। सोही नगरपालिकाको वडा नं. ४ का उनका श्रीमान् ३५ वर्षीय उमेश यादव सोही बिहान नजिकैको जंगल क्षेत्रमा मृत फेला परेका थिए।
जिल्ला प्रहरी कार्यालयका प्रवक्ता प्रहरी नायब उपरीक्षक ओमप्रकाश खनालका अनुसार दम्पतीका चार वर्षीय छोरा पनि तिघ्रामा चोट लागेको अवस्थामा फेला परेका छन्। बालक आमासँग माइतीघरमा बस्दै आएका थिए।
खनालका अनुसार उमेश यादव केही दिनअघि वैदेशिक रोजगारीबाट फर्किएका थिए र घटनाको अघिल्लो दिन ससुराली घर पुगेका थिए।
घटनाको परिस्थिति शंकास्पद रहेको प्रहरीले जनाएको छ। प्रहरी टोली घटनास्थल पुगेको र अनुसन्धान भइरहेको खनालले बताएका छन्। दुवैको मृत्युको कारण प्रहरीले खुलाएको छैन।
