काठमाडौँ — यस वर्षको दशैँ अवधिमा देशभर भएका सडक दुर्घटनामा १२४ जनाको मृत्यु भएको छ भने २,९८८ जना घाइते भएका नेपाल प्रहरी प्रधान कार्यालयले जनाएको छ।
प्रहरीका अनुसार असोज २५ देखि कात्तिक ८ गतेसम्मको अवधिमा १,३३९ वटा सडक दुर्घटना भएका छन्। प्रहरीका केन्द्रीय प्रवक्ता प्रहरी नायब महानिरीक्षक अबिनारायण काफ्लेलाई उद्धृत गर्दै यो तथ्याङ्क सार्वजनिक गरिएको हो।
कोशी प्रदेशमा यस दशैँमा ४१३ वटा दुर्घटना हुँदा २२ जनाको मृत्यु भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीले जनाएको छ। गत वर्ष सोही प्रदेशमा २९१ वटा दुर्घटना हुँदा २६ जनाको मृत्यु भएको थियो।
प्रदेशमा सबैभन्दा बढी मोरङ जिल्लामा १७० वटा दुर्घटना भएका छन्। सुनसरीमा ८७ वटा दुर्घटनामा १० जनाको मृत्यु र १५६ जना घाइते भएका छन्।
सो अवधिमा कोशी प्रदेशमा ट्राफिक नियम उल्लङ्घन गर्ने २,४५७ सवारीसाधनलाई कारबाही गरिएको र २५ लाख २९ हजार रुपैयाँ जरिवाना उठाइएको प्रहरीले जनाएको छ।
सत्य, तथ्य र स्वतन्त्र सामूदायिक डिजिटल मिडिया
