काठमाडौँ — बङ्गालको खाडीमा विकसित शक्तिशाली चक्रवात अर्नब कमजोर भएर बलियो न्यून चापीय क्षेत्रमा परिणत भएकाले नेपालमा तीव्र हावाहुरीको सम्भावना नरहेको जल तथा मौसम विज्ञान विभागले जनाएको छ।
विभागको मौसम पूर्वानुमान महाशाखाकी वरिष्ठ मौसमविद् विभूति पोखरेलका अनुसार अर्नबको प्रभावले हल्कादेखि मध्यम वर्षा भने हुन सक्छ, तर चक्रवात शक्तिशाली हुँदा आशङ्का गरिएजस्तो डरलाग्दो हावाहुरी आउने सम्भावना छैन। अन्य क्षेत्रको तुलनामा पूर्वी क्षेत्रमा केही बढी वर्षा हुन सक्ने उनले बताइन्।
चक्रवातको प्रभाव मुख्यतः बिहीबारदेखि शनिबारसम्म रहने महाशाखाले जनाएको छ। बिहीबार साँझदेखि हिमपात सुरु हुन सक्ने भएकाले उच्च पहाडी तथा हिमाली क्षेत्रमा विशेष सतर्कता अपनाउन पोखरेलले आग्रह गरिन्। जोखिमयुक्त, पहिरो जान सक्ने र कच्ची सडक भएका क्षेत्रमा विचार गरेर मात्र यात्रा गर्न उनले सुझाव दिइन्, तर राम्रा राजमार्गमा डराउनुपर्ने अवस्था नरहेको उनको भनाइ छ।
महाशाखाका अनुसार आज कोशी र बागमती प्रदेशका पहाडी क्षेत्रका केही स्थानमा तथा बाँकी पहाडी क्षेत्रका केही ठाउँमा हल्कादेखि मध्यम वर्षा र हिमपात हुन सक्छ। मधेश, कोशी र बागमतीका पहाडी तथा तराई क्षेत्रका केही स्थानमा र गण्डकी, लुम्बिनी, कर्णाली तथा सुदूरपश्चिमका एक–दुई स्थानमा पनि वर्षाको सम्भावना छ।
पश्चिमी वायुको आंशिक प्रभावसँगै अर्नबको प्रणाली आजदेखि नेपालमा प्रवेश गर्न थालेको महाशाखाको विश्लेषण छ। यसअघि विभागले बिहीबार रातिदेखि शनिबारसम्म भारी वर्षा, हिमपात र हिमपहिरोको जोखिम रहने भन्दै उच्च सतर्कता अपनाउन आग्रह गरेको थियो।
सत्य, तथ्य र स्वतन्त्र सामूदायिक डिजिटल मिडिया
