काठमाडौँ — चालु आर्थिक वर्षको पहिलो त्रैमासमा नेपालको निर्यात ५७ दशमलव ०३ प्रतिशतले बढेर १ खर्ब १४ अर्ब २८ करोड रुपैयाँ पुगे पनि आयात झनै ठूलो मात्रामा बढ्दा व्यापार घाटा ५ खर्ब ३२ अर्ब ४९ करोड रुपैयाँ पुगेको भन्सार विभागले जनाएको छ।
विभागका अनुसार साउनदेखि असोजसम्मको तीन महिनामा ६ खर्ब ४६ अर्ब ७८ करोड रुपैयाँको सामान आयात भएको छ, जुन गत वर्षको सोही अवधिको करिब ४ खर्ब ६८ अर्ब रुपैयाँभन्दा ३८ दशमलव १८ प्रतिशत बढी हो। चाडपर्वको माग बढेको असोज महिनामा मात्र २ खर्ब ४५ अर्ब २६ करोड रुपैयाँको आयात भएको विभागको तथ्याङ्कमा उल्लेख छ।
आयात र निर्यात दुवै बढ्दा कुल वैदेशिक व्यापार ४० दशमलव ७१ प्रतिशतले बढेर ७ खर्ब ६१ अर्ब ७ करोड रुपैयाँ पुगेको छ। व्यापार घाटा गत वर्षको सोही अवधिको तुलनामा ३४ दशमलव ७१ प्रतिशतले बढेको हो। कुल व्यापारमा निर्यातको हिस्सा १५ दशमलव ०२ प्रतिशत र आयातको हिस्सा ८४ दशमलव ९८ प्रतिशत रहेको विभागले जनाएको छ।
आयाततर्फ पेट्रोलियम पदार्थ सबैभन्दा ठूलो शीर्षक बनेको छ, जसमा करिब १ खर्ब १९ अर्ब रुपैयाँ खर्च भएको छ। सबैभन्दा बढी आयात हुने एकल वस्तुमा कच्चा सोयाबिन तेल ५२ अर्ब ६० करोड रुपैयाँको रहेको छ भने डिजेल ४७ अर्ब ३१ करोड, पेट्रोल २४ अर्ब ६२ करोड र एलपीजी २३ अर्ब १८ करोड रुपैयाँको आयात भएको छ। रासायनिक मल १९ अर्ब ३० करोड र स्मार्टफोन १८ अर्ब ८१ करोड रुपैयाँको आयात भएको विभागको तथ्याङ्क छ।
निर्याततर्फ वनस्पति तेल अग्रस्थानमा छ। सोयाबिन तेल मात्र ५२ अर्ब ६० करोड रुपैयाँको निर्यात भएको छ भने धागो ४ अर्ब ९७ करोड, चिया, कफी र मसला ४ अर्ब ६५ करोड र अलैंची २ अर्ब ५७ करोड रुपैयाँको निर्यात भएको विभागले जनाएको छ। गत आर्थिक वर्षमा नेपालको कुल निर्यात ३ खर्ब १५ अर्ब रुपैयाँ नाघेर कीर्तिमान बनेको थियो।
व्यापार साझेदारतर्फ भारत सबैभन्दा ठूलो बनेको छ। भारतबाट ३ खर्ब ६६ अर्ब रुपैयाँको आयात र भारततर्फ ९५ अर्ब ५९ करोड रुपैयाँको निर्यात हुँदा द्विपक्षीय व्यापार घाटा करिब २ खर्ब ७१ अर्ब रुपैयाँ पुगेको छ। दोस्रो ठूलो साझेदार चीनबाट १ खर्ब ३४ अर्ब रुपैयाँको आयात भए पनि चीनतर्फको निर्यात ६७ करोड रुपैयाँ मात्र रहेको विभागको तथ्याङ्कमा उल्लेख छ।
सत्य, तथ्य र स्वतन्त्र सामूदायिक डिजिटल मिडिया
