काठमाडौँ — प्रधानमन्त्री बालेन्द्र शाह (बालेन) र राष्ट्रिय स्वतन्त्र पार्टी (रास्वपा) का सभापति रवि लामिछानेबीच बुधबार चार घण्टा भेटवार्ता भएको छ। हात्तीगौडास्थित लामिछानेको निवासमा भएको भेटवार्तामा भारत भ्रमणदेखि निजामती कर्मचारी विधेयक अध्यादेशबाट ल्याउने विषयसम्म छलफल भएको सेतोपाटीले उच्च स्रोतलाई उद्धृत गर्दै जनाएको छ।
लामिछाने हालै भारतमा तीर्थाटन गरी नेपाल फर्किएका हुन्। नेपाल फर्किएपछि प्रधानमन्त्री बालेन उनलाई भेट्न उनको निवास पुगेका थिए। भेटमा लामिछानेको भारत भ्रमणका साथै सांसद खगेन्द्र सुनार र नेपाल प्रहरीका महानिरीक्षक दानबहादुर कार्कीको विषयमा पनि छलफल भएको स्रोतले जनाएको छ।
सांसद सुनारमाथि एक महिलालाई फोनमार्फत दुर्व्यवहार गरेको आरोप लागेपछि रास्वपाले आन्तरिक रूपमा छानबिन गरिरहेको छ। निर्वाचनका बेला पोशाक खरिदमा भ्रष्टाचार भएको भन्दै सुनारले प्रश्न उठाउँदै आएका छन् र उक्त घटनामा संसदीय समितिले पनि छानबिन गरिरहेको छ।
प्रहरी महानिरीक्षक कार्कीलाई हटाउन लागिएको भन्ने चर्चा विभिन्न सञ्चारमाध्यममा आए पनि त्यसको पुष्टि भने भइसकेको छैन। यस विषयमा पनि दुई नेताबीच कुराकानी भएको स्रोतको भनाइ छ।
सरकारले संसदमा दर्ता भएको निजामती कर्मचारी विधेयक फिर्ता लिएर अध्यादेशमार्फत ल्याउन खोजेको विषयमा पनि छलफल भएको छ। अध्यादेशको तयारीअनुसार ३० वर्ष सेवा अवधि पूरा गरेका र ५५ वर्ष उमेर पुगेका कर्मचारीलाई अवकाशमा पठाउने प्रस्ताव छ, जसले कर्मचारीबीच खैलाबैला मच्चिएको छ।
यी विषयबाहेक मन्त्रिमण्डल, पार्टी र सांसदका विविध विषयमा पनि छलफल भएको स्रोतले जनाएको छ।
सत्य, तथ्य र स्वतन्त्र सामूदायिक डिजिटल मिडिया
