सिन्धुलीको फिक्कल गाउँपालिका–६ नागथानमा आइतबार बिहान यात्रुवाहक जिप सुनकोशी नदीमा खस्दा तीन महिलाको मृत्यु भएको छ। चालकसहित चार जना घाइते भएका छन् भने चालकले अन्य तीन जना बेपत्ता रहेको बताएका छन्।
जिल्ला प्रहरी कार्यालय सिन्धुलीका प्रहरी नायब उपरीक्षक विजय श्रेष्ठलाई उद्धृत गर्दै सेतोपाटीले जनाएअनुसार मृतक महिलाहरूको सनाखत हुन बाँकी छ। घाइतेमध्ये ३८ वर्षीया सम्झना राईको अवस्था गम्भीर रहेको श्रेष्ठले बताएका छन्।
काठमाडौँबाट खोटाङतर्फ जाँदै गरेको को १ ज २९७६ नम्बरको जिप बिहान करिब साढे २ बजे मध्यपहाडी लोकमार्गबाट झन्डै २०० मिटर तल नदीमा खसेको हो।
घाइतेहरूमा ओखलढुंगाका २९ वर्षीय चालक आशिष विष्ट, खोटाङकी सम्झना राई र दुई बालबालिका छन्। उद्धारपछि उनीहरूलाई उदयपुरको घुर्मीस्थित जनसेवा हेल्थ सेन्टर लगिएको थियो। अनलाइनखबरले थप उपचारका लागि उनीहरूलाई सिन्धुली जिल्ला अस्पताल पठाइएको जनाएको छ।
बेपत्ताको खोजीमा नेपाल प्रहरी र सशस्त्र प्रहरी परिचालन भएका छन्। सशस्त्र प्रहरीका सहप्रवक्ता शैलेन्द्र थापाका अनुसार खुर्कोटस्थित विपद् व्यवस्थापन बेसबाट नौ गोताखोरसहित १० जनाको टोली खटिएको छ। ओखलढुंगाको हर्कपुरस्थित अस्थायी बेसबाट पनि १० जना परिचालन भएको सेतोपाटीले जनाएको छ।
बेपत्ता भनिएका तीन जनाको विवरण चालकको भनाइमा आधारित छ। दुर्घटनाको कारण खुल्न बाँकी छ।
