काठमाडौँ — बिहीबार रातिदेखि देशका अधिकांश ठाउँमा वर्षा भइरहेको छ भने उच्च पहाडी तथा हिमाली क्षेत्रमा हिमपात भएको छ ।
जल तथा मौसम विज्ञान विभागले विशेष मौसम बुलेटिन जारी गर्दै कोशी, मधेस, बागमती, गण्डकी र लुम्बिनी प्रदेशमा भारी वर्षाको सम्भावना रहेको जनाएको छ । विभागले बाढी, पहिरो र डुबानको जोखिमप्रति सतर्क रहन आग्रह गरेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले काठमाडौँ उपत्यकासहित ६६ जिल्लामा उच्च सतर्कता अपनाउन आग्रह गरेको छ । प्राधिकरणका प्रवक्ता रामबहादुर केसीका अनुसार सतर्कता अपनाइएका जिल्लामा अत्यावश्यकबाहेकका सवारीसाधन बेलुका ७ बजेदेखि रोक लगाइएको छ ।
विभागका महानिर्देशक कमलराम जोशीका अनुसार वर्षा शनिबारसम्म जारी रहने र आइतबारदेखि क्रमशः सुधार हुँदै जाने छ ।
वर्षाका कारण आन्तरिक हवाई उडान प्रभावित भएका छन् । त्रिभुवन अन्तर्राष्ट्रिय विमानस्थलका प्रवक्ता रिन्जी शेर्पाका अनुसार भद्रपुर, भरतपुर, पोखरा र सुर्खेतलगायत गन्तव्यका उडान प्रभावित भएका छन् ।
सडकतर्फ पहिरोका कारण बेनी–जोमसोम सडक अवरुद्ध भएको छ भने दाउन्ने क्षेत्र र बीपी राजमार्गको काभ्रे खण्डमा पहिरो खस्दा यातायात प्रभावित भएको छ । मुग्लिन–नारायणगढ खण्डमा पहिरोको जोखिम देखिएपछि आवश्यक सतर्कता अपनाइएको जनाइएको छ ।
सत्य, तथ्य र स्वतन्त्र सामूदायिक डिजिटल मिडिया
