काठमाडौँ — वर्षा र पहिरोका कारण शनिबार बिहानसम्म पृथ्वी राजमार्गसहित देशभरका १२ भन्दा बढी प्रमुख सडक खण्ड अवरुद्ध भएको प्रहरी प्रधान कार्यालयले जनाएको छ। अवरुद्ध खण्डहरूमा राजधानी जोड्ने प्रमुख मार्गहरू पनि परेका छन्।
पृथ्वी राजमार्ग धादिङको परेवाभीर र गजुरी–२ खण्डमा अवरुद्ध छ। बीपी राजमार्ग बिहान ४:५५ बजेदेखि सिन्धुलीको पिन्थली, रोशी–९ र गिम्दीबेसी खण्डमा अवरुद्ध भएको अनलाइनखबरले जनाएको छ। कर्णाली राजमार्ग सुर्खेतको औलिसे र बराहताल–७ खण्डमा, मध्यपहाडी लोकमार्ग खोटाङ खण्डमा, बागमती करिडोर र कान्ति लोकपथ ललितपुर खण्डमा, कालीगण्डकी करिडोर बागलुङ खण्डमा तथा नाग्मा–गमगढी सडक खण्डमा पनि यातायात ठप्प छ।
कुलेकानी जलाशयको सतह क्षमताको नजिक पुगेको छ। जलाशय केन्द्रका प्रमुख प्रहलाद राउतका अनुसार सतह १,५२७.९३ मिटर पुगेको छ भने जलाशयको पूर्ण क्षमता १,५३० मिटर हो। जलाशयको ढोका खोल्नुपर्ने अवस्था आए बागमती र राप्ती नदी तटीय क्षेत्रका बासिन्दालाई सतर्क रहन र डुबानको जोखिम भएका क्षेत्रमा नजान आग्रह गरिएको छ।
चक्रवात ‘अर्नाब’ को अवशेषका कारण आएको वर्षाले देशका विभिन्न भागमा जनजीवन प्रभावित बनाएको छ। मौसम पूर्वानुमान महाशाखाका अनुसार शनिबार दिउँसोपछि वर्षा क्रमशः कम हुँदै जाने अपेक्षा गरिएको छ। सडक विभाग र स्थानीय प्रशासनले अवरुद्ध खण्ड खुलाउने प्रयास जारी राखेका छन्। यात्रु तथा सवारीचालकलाई यात्रा अघि सडकको अवस्था बुझेर मात्र निस्कन आग्रह गरिएको छ।
सत्य, तथ्य र स्वतन्त्र सामूदायिक डिजिटल मिडिया
