पत्रकार धरपकडको छानबिन गरी दोषीलाई कारबाही गर्न रास्वपाको निर्देशन

काठमाडौँ — राष्ट्रिय स्वतन्त्र पार्टी (रास्वपा) ले समाचारका विषयलाई लिएर पत्रकारमाथि भएको सोधपुछ तथा समाचार कक्षमा प्रहरी प्रवेश गरी भएका गतिविधिको छानबिन गरी दोषीलाई यथाशीघ्र कारबाही गर्न सरकारलाई निर्देशन दिएको छ।

पार्टी मुख्यालयमा शनिबार सम्पन्न सचिवालय बैठकका निर्णय सार्वजनिक गर्दै प्रवक्ता जगदीश खरेलले प्रेस स्वतन्त्रता विरोधी गतिविधिमा संलग्नमाथि कुनै सम्झौता नगरी कारबाही गर्न बैठकले सरकारलाई निर्देशन दिएको राष्ट्रिय समाचार समितिले जनाएको छ।

बैठकले त्यस्ता गतिविधि गर्नेमाथि हुने कारबाहीमा कुनै सम्झौता र ढिलासुस्ती नगर्न सरकारको ध्यानाकर्षण गराएको छ। “राष्ट्रिय स्वतन्त्र पार्टी मौलिक अधिकारका रूपमा रहेको प्रेस तथा अभिव्यक्ति स्वतन्त्रता, विधिको शासन र मानव अधिकारको सम्मान गर्दछ”, बैठकपछि प्रवक्ता खरेलले भने, “प्रेस स्वतन्त्रताको सन्दर्भमा रास्वपा कहिल्यै कोहीसँग पनि सम्झौता गर्दैन।”

बैठकले प्रेस स्वतन्त्रताप्रतिको प्रतिबद्धता सुनिश्चित गर्न पनि सरकारलाई निर्देशन दिएको छ। समाचार लेखेकै आधारमा कुनै पनि सञ्चारमाध्यम, प्रकाशक, प्रसारक वा पत्रकारले आगामी दिनमा यस्तो स्थिति भोग्नु नहुनेमा पार्टी स्पष्ट रहेको खरेलले बताए।

शुक्रबार सादा पोशाकका प्रहरीले तीन सञ्चारगृहका पत्रकारलाई नियन्त्रणमा लिएर सोही साँझ छाडेको घटनामा प्रहरी र प्रधानमन्त्री कार्यालयको भनाइ बाझिएको थियो। प्रहरीले प्रधानमन्त्री कार्यालयको चासोपछि साइबर ब्युरोले सञ्चारकर्मी बोलाएको जनाएको थियो भने प्रधानमन्त्रीको सचिवालयले घटनामा आफ्नो संलग्नता र पूर्वजानकारी नरहेको बताएको थियो।

यसै बैठकले न्यायालयमा देखिएको विकृति र विसङ्गति अन्त्यका लागि संसद्मार्फत अघि बढ्ने निष्कर्ष निकालेको छ। न्यायालयको पुनःसंरचनाका लागि संसदीय दललाई निर्देशन दिइएको प्रवक्ता जगदीश खरेलले जानकारी दिए।

“न्यायालयमा देखिएका व्यथिति र विसङ्गति तथा केही न्यायाधीशलाई जोडेर सामाजिक सञ्जाल तथा सञ्चारमाध्यममा जति सन्दर्भ आइरहेका छन्, यो विषयलाई अब निरुपण गर्नुपर्छ”, बैठकको निष्कर्ष सुनाउँदै उनले भने। न्यायालयको पुनःसंरचना गर्नुपर्ने आवश्यकता महसुस भएको अवस्थामा अब संसद्बाट यसको निरुपण खोज्नुपर्ने पार्टीको निष्कर्ष छ।