गोरखा — बूढीगण्डकीको बाढीले घर बगाएपछि गोरखाको छुमनुब्री गाउँपालिका–३ पायूका मङ्गल गुरुङ अहिले गाउँमाथिको डाँडामा छिमेकीको घरछेउ टेन्ट टाँगेर बसेका छन्। अक्टोबर ११ को बाढीले उनको घर बगाएको थियो।
बाढीपछि हेलिकोप्टरबाट राहत सामग्री पुगे पनि उनीसँग खाना पकाउने भाँडाकुँडा छैन। बाढीले चम्चासमेत बगाएपछि राहतमा पाएको खाद्यान्न पकाउनै कठिन भएको छ, काठमाडौं पोस्टले जनाएको छ।
छुमनुब्री–३ का वडाध्यक्ष रामकुमार गुरुङका अनुसार राहत सामग्रीमा भाँडाकुँडा परेका छैनन् र आगामी वितरणमा तिनलाई पनि समेट्नुपर्छ। हेलिकोप्टरले थोरै मात्र सामान बोक्न सक्ने र खच्चड हिँड्ने बाटो पनि नभएकाले घर बगाएका परिवारलाई हेलिकोप्टरबाट पुगेको राहत दुई–चार दिनलाई मात्र पुग्ने उनको भनाइ छ।
छुमनुब्री–३ मा मात्र ३० भन्दा बढी परिवारको घर बगाएको छ। सुरुको राहतमा चामल, तेल, चिउरा, दाल, त्रिपाल र लुगाकपडा पुगे पनि बाढीले उत्तरी बस्ती जोड्ने एकमात्र सडक बिगारेकाले आवश्यक मात्रामा सामग्री पुर्याउन कठिन भएको छ।
खुर्लाबेसीमा बूढीगण्डकीले सडक कटान गर्दा छुमनुब्री र धार्चेका तीन वडा सम्पर्कविहीन भएका छन्। खुर्लाबेसी–सल्लेरी खण्डको लार्के सडक एक दर्जनभन्दा बढी ठाउँमा बिग्रिएको छ। छुमनुब्री गाउँपालिकाका प्रमुख प्रशासकीय अधिकृत नारायण सापकोटाका अनुसार सडक अवरुद्ध भएकाले हेलिकोप्टर नै खाद्यान्न र अत्यावश्यक सामग्री ढुवानीको एकमात्र माध्यम बनेको छ।
सहायक प्रमुख जिल्ला अधिकारी नेत्रप्रसाद शर्माले प्रभावित क्षेत्रमा पर्याप्त राहत पठाइएको दाबी गरे पनि धार्चे गाउँपालिकाका अध्यक्ष लक्ष्मण गुरुङका अनुसार घर नबगाएका गाउँमा समेत नुन र तेल सकिन थालेको छ। केरौजाबेसी र हुलचोकका बासिन्दा घरमा अन्न भए पनि नुन–तेल नभएर चिन्तित छन्।
