काठमाडौँ — नेपाली काङ्ग्रेसका नवनिर्वाचित १९ पदाधिकारी र २२७ केन्द्रीय सदस्यले बिहीबार पद तथा गोपनीयताको शपथ लिएका छन्।
सानेपास्थित पार्टी केन्द्रीय कार्यालयमा सभापति गगन थापाले उनीहरूलाई शपथ खुवाएका हुन्। शपथपछि निर्वाचित पदाधिकारी र सदस्यलाई प्रमाणपत्र वितरण गरिएको अनलाइनखबरले जनाएको छ। सभापति थापाले भने यसअघि नै असोज ३१ गते फूलपातीका दिन शपथ लिएका थिए।
अदालतमा मुद्दा विचाराधीन रहेका चार केन्द्रीय सदस्यलाई भने शपथ खुवाइएको छैन। सन्तोष चालिसे, मोहन बस्नेत, विनिता खड्का र उमेशचन्द्र यादवले शपथ लिएनन्। पार्टीले मुद्दा किनारा नलागेसम्म उनीहरूलाई शपथ नखुवाउने निर्णय गरेको सेतोपाटीले जनाएको छ।
शपथ समारोहमा वरिष्ठ उपसभापति विश्वप्रकाश शर्माले देश पहिले, काङ्ग्रेस पछि भन्ने सिद्धान्तमा अघि बढ्न नेताहरूलाई आग्रह गरे।
पार्टीको १५औँ महाधिवेशन असोज १८ देखि २३ गतेसम्म काठमाडौँमा भएको थियो र त्यसको अन्तिम मतपरिणाम असोज ३० गते सार्वजनिक भएको थियो। महाधिवेशनबाट थापा सभापति निर्वाचित भएका हुन्।
सत्य, तथ्य र स्वतन्त्र सामूदायिक डिजिटल मिडिया
