काठमाडौँ — नेपाल प्रिमियर लिग (एनपीएल) मा कर्णाली याक्सले विराटनगर किङ्सलाई ४ विकेटले हराउँदै लगातार दोस्रो जित निकालेको छ।
कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट रङ्गशालामा बिहीबार साँझ भएको खेलमा विराटनगरले दिएको १८७ रनको लक्ष्य कर्णालीले १९.५ ओभरमा ६ विकेट गुमाएर पूरा गर्यो।
टस हारेर पहिले ब्याटिङ गरेको विराटनगरले २० ओभरमा ७ विकेट गुमाएर १८६ रन बनाएको थियो। विराटनगरका लोकेश बमले ५२ बलमा ३ चौका र ९ छक्कासहित ८७ रन बनाए। एन्जेलो म्याथ्युजले ३१ र आन्द्रे रसेलले २७ रन जोडे। कर्णालीका कप्तान सोमपाल कामीले ४ विकेट लिए।
जवाफी ब्याटिङमा कर्णालीका सोमपाल कामीले ३२ बलमा ४ चौका र ३ छक्कासहित अविजित ६२ रन बनाए। पवन सर्राफले ३६, आरिफुल इस्लामले ३२ र गुलशन झाले अविजित २८ रन जोडे। विराटनगरका म्याथ्युजले ३ विकेट लिए।
यो जितसँगै कर्णालीले प्रतियोगितामा लगातार दोस्रो जित दर्ता गरेको छ भने विराटनगरको यो लगातार दोस्रो हार हो।
सत्य, तथ्य र स्वतन्त्र सामूदायिक डिजिटल मिडिया
