काठमाडौँ — बिचौलिया भएको आरोपमा पक्राउ परेका इनाम सापकोटाको मोबाइल फोनबाट प्रधानन्यायाधीश डा. मनोज शर्मादेखि सर्वोच्च अदालतका न्यायाधीश हरि फुयालसम्मका नाम र सम्पर्कको विवरण आएको अनलाइनखबरले जनाएको छ।
सम्पत्ति शुद्धीकरण अनुसन्धान विभागले सापकोटाको फोन नेपाल प्रहरी प्रधान कार्यालयको डिजिटल फरेन्सिक प्रयोगशालामा पठाएको थियो। प्रयोगशालाको प्रतिवेदनमा आफन्तका नाममा रहेका दुई खातामा रकम जम्मा गर्न भनिएको सन्देश भेटिएको समाचारमा उल्लेख छ। अमेरिकामा निराजन पाण्डेको खातामा ७,५०० डलर वा नेपालमा कविता पाण्डेको खातामा त्यस बराबरको रकम जम्मा गर्ने विकल्प सन्देशमा थियो। त्यही पानामा प्रधानन्यायाधीश शर्मा, पूर्वप्रहरी अतिरिक्त महानिरीक्षक विश्वराज पोखरेल र सशस्त्र प्रहरीका बंशी दाहालको नाम पनि छ, तर ती नाम आउनुको अर्थ उनीहरूको संलग्नता होइन र रकमको मुद्रा पनि स्पष्ट नभएको समाचारमा जनाइएको छ।
समाचारअनुसार सापकोटाले न्यायाधीश फुयाललाई सन्देश पठाएर रोहित गुप्तालाई थुनामै राख्न र प्रधानमन्त्रीले चासो दिएको भन्दै मुद्दा खारेज गर्न भनेका थिए। जवाफमा फुयालले गुप्तालाई २ करोड रुपैयाँ धरौटीमा छाडिएको र भोलिपल्ट साँझ भेट्न प्रस्ताव गरेको विवरण विभागले दिएको समाचारमा उल्लेख छ।
प्रधानन्यायाधीश शर्माले विज्ञप्ति जारी गर्दै आफ्नो नाम जोडिएका समाचारमा सत्यता नभएको, ती व्यक्तिसँग प्रत्यक्ष वा अप्रत्यक्ष चिनजान र सम्पर्क नरहेको र कहिल्यै भेट नभएको बताएका छन्। पोखरेलले पनि सापकोटालाई नचिनेको र कुनै सम्बन्ध नरहेको बताएका छन्। न्यायाधीश फुयाल र दाहालले अनलाइनखबरसँग सम्पर्कमा आउन चाहेनन्।
सापकोटाले आफूलाई प्रधानमन्त्री बालेन्द्र शाह, प्रधानसेनापति र अमेरिकी दूतावाससँग नजिक भएको भन्दै सम्पर्क बनाएको विभागसम्बद्ध स्रोतलाई उद्धृत गर्दै समाचारमा जनाइएको छ। नेपाल बार एसोसिएसनका अध्यक्ष विजय मिश्रले विवरण छनोट गरी सार्वजनिक गर्दा अनुसन्धान प्रभावित हुने भन्दै सबै विवरण पारदर्शी रूपमा सार्वजनिक गर्न माग गरेका छन्। विभागको अनुसन्धान जारी छ।
सत्य, तथ्य र स्वतन्त्र सामूदायिक डिजिटल मिडिया
