चिकित्सा शिक्षासम्बन्धी छ माग राखेर डा. गोविन्द केसी बिहीबार इलाममा अनशन बसेका छन्। स्वास्थ्यखबरमा प्रकाशित विज्ञप्तिमा उनले नारायण मन्दिरमा कात्तिक १२ गते साँझ ५ बजेदेखि पच्चीसौँ सत्याग्रह थालेको घोषणा गरेका छन्। थपिएको समयभित्र पनि सरकारले माग सम्बोधन नगरेको उनको भनाइ छ।
केसीको विरोध गेटामा एमबीबीएस र नर्सिङ सञ्चालनको अनुमति तथा विभिन्न कलेजमा बढाइएको सिटसँग सम्बन्धित छ। आवश्यक पूर्वाधार र प्राज्ञिक जनशक्ति नपुगेको आरोप लगाउँदै उनले ती निर्णय खारेज गर्न माग गरेका छन्। सम्बन्धित पदाधिकारीको नियुक्ति र सम्भावित स्वार्थको द्वन्द्वबारे निष्पक्ष छानबिन गर्नुपर्ने माग पनि छ।
गेटाको शिक्षण अस्पताल पूर्ण क्षमतामा चलाउने र सार्वजनिक स्रोत प्रयोग गर्ने संस्थामा ७५ प्रतिशत छात्रवृत्ति लागू गर्ने विषय उनका मागमा समेटिएका छन्। उनले साउन ११ मा सरकारसँग भएको सहमति कार्यान्वयन गर्न पनि आग्रह गरेका छन्।
इलाम, उदयपुर र डडेलधुरामा सरकारी मेडिकल संस्था स्थापना गर्ने पुराना सहमति कार्यान्वयन गर्नुपर्ने उनको माग छ। बर्दिवास मेडिकल कलेज आयोजना खारेज गर्ने निर्णय उल्ट्याएर निर्माण अघि बढाउनुपर्ने पनि उनले बताएका छन्।
सत्य, तथ्य र स्वतन्त्र सामूदायिक डिजिटल मिडिया
