काठमाडौँ — नेपाली कांग्रेसका सभापति गगन थापाले सरकारको स्वेच्छाचारी प्रवृत्तिले सीमा नाघेको भन्दै सरकारलाई पाँचवटा सन्देश दिएका छन्। सानेपास्थित पार्टी केन्द्रीय कार्यालयमा आइतबार बसेको पदाधिकारी बैठकपछि सञ्चारकर्मीसँग कुरा गर्दै उनले सरकारमा रहेका सीमित व्यक्तिले आफूलाई नै राज्य र आफ्नो इच्छालाई नै कानुन ठान्न थालेको बताएको अनलाइनखबरले जनाएको छ।
राज्य शक्तिको स्वेच्छाचारी प्रयोगले सीमा नाघिसकेको उनले बताए।
“हामी नै राज्य हौँ र मेरो इच्छा नै कानुन हो भन्ने भ्रम सरकारले नपाले हुन्छ।”
सत्तारुढ राष्ट्रिय स्वतन्त्र पार्टी (रास्वपा) ले सरकारका सबै निर्णयको जिम्मेवारी लिनुपर्ने थापाले बताए। राम्रा कामको श्रेय पार्टीले लिने र नराम्रा कामको दोष प्रधानमन्त्रीलाई मात्र दिने प्रवृत्ति स्वीकार्य नहुने उनको भनाइ छ। विज्ञप्ति निकालेर मात्र नपुग्ने भन्दै उनले संसदमा प्रधानमन्त्रीलाई प्रश्न सोधेर परिणाम देखाउन रास्वपालाई आग्रह गरे।
पत्रकार पक्राउ प्रकरणमा उनले कडा आपत्ति जनाए। समाचार कक्षमा प्रवेश गर्ने, सञ्चारगृहबाहिर गाडी राख्ने र पक्राउको आदेश दिनेहरूमाथि के कारबाही भयो भन्ने प्रश्न उनले उठाए। कुन कानुनअनुसार पक्राउ गरिएको हो र अधिकारबाहिर गएका प्रहरीमाथि के कारबाही भयो भन्ने जवाफ सरकारले दिनुपर्ने उनले बताए। प्रधानमन्त्रीको सचिवालयबाट २८ जना पत्रकारको सूची प्रहरीलाई पठाइएको भन्ने समाचार बाहिर आएको उल्लेख गर्दै उनले त्यसलाई गम्भीर रूपमा लिनुपर्ने बताए। पत्रकार पक्राउको घटनाले पञ्चायती शासनकालको याद दिलाएको उनको भनाइ छ।
कांग्रेसले रास्वपाको पाँचवर्षे जनादेशको सम्मान गर्ने र समयअघि सरकार ढाल्ने काम नगर्ने उनले स्पष्ट पारे। तर सरकारमाथि निगरानी राख्ने काम कांग्रेसले गरिरहने उनले बताए।
जुनसुकै प्रकरणमा हुने निष्पक्ष छानबिनलाई कांग्रेसले समर्थन गर्ने तर राजनीतिक पूर्वाग्रहका आधारमा छानेर गरिने छानबिन स्वीकार्य नहुने उनले बताए। त्यस्तो प्रवृत्तिको कांग्रेसले सशक्त प्रतिवाद गर्ने उनको चेतावनी छ।
बलियो प्रधानमन्त्रीभन्दा बलिया संस्थाहरू आवश्यक रहेको थापाले बताए। प्रहरी, कर्मचारीतन्त्र, न्यायपालिका र संवैधानिक निकायहरू बलिया हुनुपर्ने भन्दै उनले आफूअनुकूल व्यक्ति राख्दैमा संस्था बलियो नहुने बताए।
आइतबारको बैठक कार्यवाहक सभापति पूर्णबहादुर खड्काले बोलाएका थिए। कांग्रेस संसदीय दलको बैठक सोमबार बिहान साढे ८ बजे सिंहदरबारमा बस्ने भएको छ।
सत्य, तथ्य र स्वतन्त्र सामूदायिक डिजिटल मिडिया
