इलाम — चिकित्सा शिक्षा र स्वास्थ्य क्षेत्रमा सुधारको माग गर्दै इलाममा चार दिनदेखि अनशनरत डा. गोविन्द केसीको स्वास्थ्य अवस्था गम्भीर बनेको इलाम अस्पतालले जनाएको छ।
अस्पतालका मेडिकल सुपरिन्टेन्डेन्ट अमिताभ ठाकुरले आइतबार पत्रकार सम्मेलनमा केसीको अवस्था ज्यान जोखिममा पार्ने स्तरमा पुगेको बताएको अनलाइनखबरले जनाएको छ। स्वास्थ्यमा गम्भीर समस्या देखिएपछि उनलाई शनिबार अस्पताल भर्ना गरिएको थियो।
उपचारमा संलग्न डा. महेश आचार्यका अनुसार केसीको रगतमा चिनीको मात्रा उल्लेख्य रूपमा घटेको छ र पिसाब नलीको सङ्क्रमण बढेको छ।
स्वास्थ्य अवस्था बिग्रँदै गएपछि अस्पतालले स्वास्थ्य मन्त्रालय र कोशी प्रदेश सरकारलाई थप हस्तक्षेप र आवश्यक उपचारका लागि पत्र लेखेको छ। कोशी प्रदेशका स्वास्थ्य सचिव कृतिपाल सुवेदी आइतबार इलाम अस्पताल पुगेर केसीलाई भेटेका छन्।
सत्य, तथ्य र स्वतन्त्र सामूदायिक डिजिटल मिडिया
