काठमाडौँ — नेपाल प्रिमियर लिग (एनपीएल) को तेस्रो संस्करणमा जनकपुर बोल्ट्सले आइतबार पोखरा एभेन्जर्सलाई ९ रनले हराउँदै दोस्रो जित निकालेको छ, अनलाइनखबरले जनाएको छ।
टस हारेर पहिले ब्याटिङ गरेको जनकपुरले २० ओभरमा ७ विकेट गुमाएर १४७ रन बनाएको थियो। ओपनर तृतराज दासले ५५ बलमा ७ चौका र १ छक्कासहित ६१ रन बनाए। उनले मोइन अलीसँग ४७ रनको ओपनिङ साझेदारी गरे; अलीले १६ बलमा २१ रन बनाए। अभिषेक तिवारीले १० बलमा अविजित २४ रन जोडे।
१४८ रनको लक्ष्य पछ्याएको पोखरा २० ओभरमा ९ विकेट गुमाएर १३८ रनमा सीमित भयो। कप्तान कुशाल भुर्तेलले २४ बलमा ५ चौकासहित ३५ रन बनाए पनि जितका लागि पर्याप्त भएन। बिपिन आचार्यले २० र बिपिन खत्रीले अविजित १७ रन बनाए।
बलिङमा जनकपुरका मोइन अलीले ३ विकेट लिए भने कप्तान हरमित सिंह र सैफ हसनले दुई–दुई विकेट लिए। पोखराका लागि शकिब अल हसनले ४ ओभरमा १५ रन खर्चेर ३ विकेट लिएका थिए। दास खेलको उत्कृष्ट खेलाडी भए।
यो पोखराको लगातार दोस्रो हार हो। जितसँगै जनकपुर अङ्कतालिकाको दोस्रो स्थानमा उक्लिएको एनपीएलले जनाएको छ।
सत्य, तथ्य र स्वतन्त्र सामूदायिक डिजिटल मिडिया
