काठमाडौँ — प्रधानमन्त्री बालेन्द्र शाह (बालेन) ले सही समय आएपछि कसैले पनि जवाफदेहिताबाट उम्कन नपाउने चेतावनी दिएका छन्। उनले आइतबार फेसबुकमा कुनै खास घटना वा व्यक्तिको नाम नलिई यस्तो टिप्पणी गरेको अनलाइनखबरले जनाएको छ।
उनले लेखेका छन्, सही समय आएपछि सबैको नराम्रो समय आउँछ र एक–दुई जनाले छुट पाउँछन् भनेर कसैले सपना देख्नु हुँदैन।
न्यायाधीशहरूको बिचौलियासँगको सम्पर्कसम्बन्धी समाचार र सञ्चारगृहमा प्रहरी पुगेको घटनालाई लिएर सरकारको आलोचना भइरहेका बेला प्रधानमन्त्रीको यो टिप्पणी आएको हो।
प्रधानमन्त्रीका प्रमुख राजनीतिक सल्लाहकार कुमार बेनले शाहको पोस्टमा टिप्पणी गर्दै ‘सही समय’ कहिले आउँछ भनेर प्रश्न गरेका छन्।
आइतबार दिउँसो बेनले छुट्टै पोस्टमा २८ जना पत्रकारलाई मेन्सन गर्दै सूचीमा नपरेकाहरूलाई पनि पत्रकार भन्न सकिन्छ कि भनेर प्रश्न गरेका थिए। नयाँ पत्रिकाले प्रधानमन्त्रीको सचिवालयले पत्रकार पक्राउका लागि २८ जनाको सूची प्रहरीलाई दिएको दाबी गरेपछि बेनको यो टिप्पणी आएको हो। प्रधानमन्त्रीको सचिवालयले भने पक्राउ प्रकरणमा आफ्नो संलग्नता र पूर्वजानकारी अस्वीकार गरिसकेको छ।
सत्य, तथ्य र स्वतन्त्र सामूदायिक डिजिटल मिडिया
