बाराको फेटा गाउँपालिका–३ मा अस्पताल उद्घाटनका क्रममा शनिबार भएको झडप र गोली प्रहारको घटनाबारे छानबिन गर्न गठित समितिले आइतबारदेखि अनुसन्धान सुरु गरेको गोरखापत्रले जनाएको छ।
मधेस प्रदेश प्रहरी कार्यालय जनकपुरले प्रहरी वरिष्ठ उपरीक्षक प्रभुप्रसाद ढकालको नेतृत्वमा तीन सदस्यीय छानबिन समिति गठन गरेको हो। समितिमा प्रहरी उपरीक्षक भुनेश्वरप्रसाद साह र प्रहरी निरीक्षक जटाशंकर यादव सदस्य छन्। समितिका संयोजक ढकालले छानबिन आइतबारदेखि थालिएको र सात दिनभित्र प्रतिवेदन बुझाइने बताएका छन्।
घटनास्थलको सुरक्षा कमान्ड सम्हालेका इलाका प्रहरी कार्यालय प्रसौनीका प्रमुख प्रहरी निरीक्षक सुमन लामा जिम्मेवारीबाट हटाइएका छन्। बाराका प्रहरी उपरीक्षक नरेन्द्र कुँवरका अनुसार लामालाई जिल्ला प्रहरी कार्यालय बारामा तानिएको छ र उनको स्थानमा प्रहरी निरीक्षक राजाबाबु ठाकुरलाई खटाइएको छ।
शनिबार सङ्घीय सरकारको अनुदानमा निर्माण गरिएको १५ शय्याको आधारभूत अस्पताल उद्घाटनका क्रममा अधुरो अस्पताल उद्घाटन गर्न खोजिएको भन्दै स्थानीयले विरोध गरेपछि झडप भएको थियो। ढकालका अनुसार विवादपछि प्रदर्शनकारीले प्रहरीमाथि आक्रमण गरेका थिए। प्रदर्शनकारीले १० वटा मोटरसाइकल जलाउनुका साथै अस्पतालको शिलालेख र कार्यक्रमस्थलको टेन्टमा तोडफोड गरेको उनले बताए।
झडपका क्रममा प्रहरीको गोली लागेर स्थानीय धर्मेन्द्र पासवानका करिब १५ वर्षीय छोरा आदित्य पासवान गम्भीर घाइते भएका छन्। उनको वीरगञ्जस्थित नेशनल मेडिकल कलेजमा उपचार भइरहेको छ। झडपमा पाँच जना प्रहरी पनि घाइते भएका छन्।
सत्य, तथ्य र स्वतन्त्र सामूदायिक डिजिटल मिडिया
