काठमाडौँ — अख्तियार दुरुपयोग अनुसन्धान आयोगले पूर्वप्रधानमन्त्री तथा नेकपाका सहसंयोजक माधवकुमार नेपाल र नेपाली कांग्रेसका नेता तथा पूर्वमन्त्री मिनेन्द्र रिजालसहित ९७ जनाविरुद्ध मंगलबार विशेष अदालतमा भ्रष्टाचार मुद्दा दायर गरेको छ। अनलाइनखबर का अनुसार आयोगले उनीहरूबाट करिब ७३ करोड ४९ लाख रुपैयाँ बिगो दाबी गरेको छ।
आयोगका अनुसार सार्वजनिक जग्गालाई छुट दर्ता गर्ने मन्त्रिपरिषद्को निर्णयमार्फत भ्रष्टाचार भएको आरोप मुद्दामा लगाइएको छ। विराटनगर क्षेत्रमा छुट परेको सार्वजनिक जग्गा दर्तामा अनियमितता भेटिएको आयोगले जनाएको छ।
मुद्दामा पूर्वभूमिसुधारमन्त्री डम्बर श्रेष्ठ, पूर्वमुख्य सचिव माधव घिमिरेकी छोरी कमला घिमिरे, पूर्वसचिव छविराज पन्त र पूर्वसहसचिव रमेशचन्द्र अधिकारी पनि प्रतिवादी छन्। तत्कालीन उपसचिवहरू गान्धीप्रसाद सुवेदी, हुपेन्द्रमणि केसी, नृपति कँडेल, हरिराज पन्त, अर्जुन खड्का, लक्ष्मण थापा र ध्रुव सापकोटा तथा शाखा अधिकृत बलराम निरौलाको नाम पनि आरोपपत्रमा छ।
भूमि व्यवस्थापन विभागका महानिर्देशक राजेन्द्र शर्मा, निर्देशक नारायण अधिकारी, उपसचिव बाबुराम खनाल, शाखा अधिकृत सीताराम पोखरेल र नायब सुब्बा बुद्धिबहादुर कार्कीविरुद्ध पनि मुद्दा दायर भएको छ।
नेपालविरुद्ध पतञ्जली जग्गा प्रकरणको अर्को भ्रष्टाचार मुद्दा पनि विशेष अदालतमा विचाराधीन छ।
सत्य, तथ्य र स्वतन्त्र सामूदायिक डिजिटल मिडिया
