डोल्पा — माथिल्लो डोल्पामा भारी हिमपातमा फसेका छ जना भारतीय पर्यटकलाई सोमबार बिहान हेलिकप्टरबाट सकुशल उद्धार गरी जिल्ला सदरमुकाम दुनै ल्याइएको जिल्ला प्रशासन कार्यालय डोल्पाले जनाएको छ।
प्रमुख जिल्ला अधिकारी जुनु हमाल ढकालका अनुसार हेलिकप्टर बिहान साढे ६ बजे उडेको थियो र पहिले दुई महिलालाई दुनै पुर्याइएको थियो। त्यसपछि हेलिकप्टर फर्केर बाँकी चार पुरुषलाई पनि उद्धार गरिएको उनले बताइन्।
उद्धार गरिएका सबै छ जनाको स्वास्थ्य अवस्था सामान्य रहेको जिल्ला प्रहरी कार्यालय डोल्पाका प्रमुख प्रहरी नायब उपरीक्षक अनिलराज गिरीले बताए। उनीहरूलाई शे–फोक्सुण्डो गाउँपालिकाको दानिगढ क्षेत्रबाट उद्धार गरिएको प्रहरीले जनाएको छ।
पर्यटकहरू ढो तरापबाट शे–फोक्सुण्डो तालतर्फ जाँदै गर्दा हिमपातले बाटो अवरुद्ध भएपछि अलपत्र परेका थिए र आइतबारदेखि सम्पर्कविहीन थिए। जिल्ला प्रशासनलाई आइतबार नै जानकारी भए पनि खराब मौसम र हेलिकप्टरको व्यवस्थापनमा कठिनाइका कारण उद्धार ढिलो भएको अधिकारीहरूले बताएका छन्।
प्रशासनका अनुसार नेपाली सेनाको हेलिकप्टरमा प्राविधिक समस्या देखिएपछि आइतबारको प्रयास सफल हुन सकेको थिएन। सोमबार बिहान ६ बजेदेखि पुनः सुरु गरिएको उद्धार सफल भएको हो।
जिल्ला प्रशासन कार्यालयले पर्यटकहरू आवश्यक अनुमति नलिई माथिल्लो डोल्पा पुगेको र भारी हिमपातको पूर्वानुमान हुँदाहुँदै अधिकारी तथा स्थानीयको चेतावनी बेवास्ता गरेको जनाएको छ। अध्यागमन विभागले हिमपात, हिमआँधी र हिमपहिरोको जोखिम देखाउँदै अक्टोबर २९ देखि ३१ सम्म प्रतिबन्धित उच्च पहाडी तथा हिमाली क्षेत्रका लागि पदयात्रा अनुमति स्थगित गरेको थियो।
सत्य, तथ्य र स्वतन्त्र सामूदायिक डिजिटल मिडिया
