काठमाडौँ — गत वैशाखदेखि नोभेम्बर १ सम्म देशभर भएका ७ हजार ६८८ विपद्का घटनामा ४०२ जनाको मृत्यु भएको र १७ जना बेपत्ता रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणका अनुसार घटनामा सबैभन्दा बढी पहिरोका १ हजार ७३५ घटना दर्ता भएका छन्। त्यसपछि सर्पदंशका १ हजार ६६८, आगलागीका १ हजार ६४१, भारी वर्षाका ५९३, आँधीका ५३७, बाढीका ४६६, वन्यजन्तु आक्रमणका ४१७ र चट्याङका ३३३ घटना रहेका छन्।
मृत्युको कारणमा सर्पदंश सबैभन्दा अगाडि छ, जसबाट ११६ जनाको मृत्यु भएको प्राधिकरणले जनाएको छ। पहिरोमा ७७, बाढीमा ४१, चट्याङमा ३६ र आगलागीमा ३२ जनाको मृत्यु भएको छ।
यी घटनामा २ हजार ५२९ जना घाइते भएका छन् भने ९ हजार ८५७ परिवार विस्थापित भएका छन्। गत अगस्ट २६ मा रसुवामा आएको भोटेकोशी बाढीको विस्तृत क्षति मूल्याङ्कन भने प्राधिकरणको सूचना प्रणालीमा अझै प्रविष्ट भइनसकेकाले यो तथ्याङ्कमा समावेश नभएको प्राधिकरणले जनाएको छ।
सत्य, तथ्य र स्वतन्त्र सामूदायिक डिजिटल मिडिया
