काठमाडौँ — नेपाल प्रिमियर लिग (एनपीएल) अन्तर्गत सोमबार कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा भएका दुई खेलमा काठमाडौँ गोर्खाज र सुदूरपश्चिम रोयल्स विजयी भएका छन्।
पहिलो खेलमा काठमाडौँ गोर्खाजले कर्णाली याक्सलाई ४ विकेटले हराउँदै प्रतियोगितामा पहिलो जित दर्ता गरेको रेडियो नेपालले जनाएको छ। कर्णालीले दिएको १८१ रनको लक्ष्य काठमाडौँले १९.४ ओभरमा ६ विकेट गुमाएर पूरा गर्यो।
काठमाडौँका लागि राशिद खानले ३३ बलमा सर्वाधिक ५० रन बनाए भने कप्तान करण केसीले २० बलमा ४४ रन जोडे। जहानदाद खान २२ रनमा अविजित रहे र मोहम्मद आदिल आलमले २० रन बनाए। कर्णालीका सोमपाल कामी र हुसेन तलतले दुई–दुई विकेट लिए।
त्यसअघि टस हारेर पहिले ब्याटिङ गरेको कर्णालीले निर्धारित २० ओभरमा ६ विकेट गुमाएर १८० रन बनाएको थियो। आरिफुल इस्लामले २२ बलमा ४४, हुसेन तलतले ३० बलमा ४० र पवन सर्राफले अविजित ३० रन बनाए। काठमाडौँका करण केसीले दुई विकेट लिए।
दोस्रो खेलमा सुदूरपश्चिम रोयल्सले चितवन राइनोजलाई ५ विकेटले हराएको एनटिभी वर्ल्डले जनाएको छ। चितवनले दिएको १३० रनको लक्ष्य सुदूरपश्चिमले १६.४ ओभरमा ५ विकेट गुमाएर, २० बल बाँकी छँदै पूरा गर्यो।
खेलको उत्कृष्ट खेलाडी घोषित ब्रान्डन म्याकमुलेनले २१ बलमा सर्वाधिक ४३ रन बनाए। इशान पाण्डेले २५, शेरफाने रदरफोर्डले १५ बलमा २१ र आरिफ शेखले २० रन जोडे। चितवनका रञ्जित कुमारले तीन विकेट लिए।
त्यसअघि टस जितेर पहिले बलिङ गरेको सुदूरपश्चिमले चितवनलाई २० ओभरमा ६ विकेटमा १२९ रनमा रोकेको थियो। चितवनका रवि बोपाराले ४० बलमा सर्वाधिक ४९ रन बनाए भने सुदूरपश्चिमका स्कट कुगेलेनले दुई विकेट लिए। जितसँगै सुदूरपश्चिम चार खेलबाट चार अंकसहित अंकतालिकाको तेस्रो स्थानमा उक्लिएको छ भने चितवन तीन खेलबाट तीन अंकसहित पाँचौं स्थानमा रहेको छ।
सत्य, तथ्य र स्वतन्त्र सामूदायिक डिजिटल मिडिया
